O 30 de xuño finalizou o prazo para realizar o proceso de regularización de persoas migrantes. Entre o 20 de abril e o 28 de xuño, un pequeno grupo de persoas estivemos todos os luns, de 17:00 a 20:00, nunha das salas parroquiais, atendendo un punto de información sobre este proceso extraordinario de regularización.
Aproveitando que SOS Racismo era unha das entidades habilitadas polo Ministerio para emitir informes de vulnerabilidade e presentar solicitudes na plataforma oficial, un equipo de oito persoas encargámonos de informar, recoller, escanear e organizar documentación, resolver dúbidas e axudar na tramitación dun gran número de expedientes.
O traballo foi moi diverso e, especialmente nas primeiras semanas, resultou especialmente intenso. Polo punto pasaron arredor dun cento de persoas -maioritariamente de Colombia, Venezuela e Perú- e, tras aclarar as súas dúbidas, realizamos as tramitacións correspondentes na plataforma.
Agora que rematou o prazo de solicitude, pechamos a atención presencial, pero o traballo continúa. Seguiremos pendentes dos expedientes a través do correo electrónico e iremos comunicando toda a información que vaiamos recibindo.
O proceso está a avanzar lentamente: o número de solicitudes case triplicou as expectativas do goberno, polo que agora toca agardar e xestionar tanto a incerteza como a desinformación.
Para calquera dúbida, podedes contactar no email: regularizacioncoia@gmail.com
