Esta semana publicábase en diversas redes sociais unha entrevista, que ofrecemos a continuación, ao noso párroco Juan Terrón, centrada no seu labor como capelán do centro penitenciario de A Lama (Pontevedra). A entrevista foi gravada como un episodio do podcast «La intensidad», presentado por Julia Escobar.
Juan comenta como comenzou a súa relación co mundo da cárcere: «Yo llegué a la cárcel por amor, por cariño a personas concretas que estaban allí internadas», persoas que coñecía a partir do seu traballo de acompañamento aos rapaces e rapazas do barrio que estaban en situación de precariedade. Ademais, engade que coordina un piso da Pastoral Penitencia para recibir a persoas presas en situación de permiso e sen recursos para ser acollidos nunha vivenda adecuada.
Paga moito a pena escoitar as reflexións que nos propón Juan sobre temas tan relevantes como as condicións de vida na cárcere, a deshumanización e despersonalización que esta provoca, a falta de ferramentas para unha reinserción que teña un verdadeiro carácter liberador, a necesidade de esperanza tanto dentro como fóra da prisión, a culpa e o perdón, a importancia dos vínculos, da comunidade, dunha rede de apoio e acompañamento, a espiritualidade como unha posibilidade de dar sentido profundo ás nosas vidas. Non fai falla dicir que moitas desas reflexións son extensibles a todas e todos nós…
Con tristeza comunicásmovos o falecemento do noso irmán José Ramón, ocorrido mentres pasaba uns días de vacacións en Vigo. O seu corpo foi velado na parroquia o pasado sábado, día 12 de xullo, dende mediodía. Ás 20:00 do mesmo sábado celebramos o seu funeral de despedida.
José Ramón López de la Osa foi un fraile dominico de pensamento profundo, de risa franca e cómprice, de espíritu forte a pesares dos seus continuados problemas de saúde, mestre e referente para moitas persoas coas que se cruzou nos camiños da vida, comprometido coas causas da xustiza e radicalmente implicado na construción do Reino fraterno que anunciou Xesús de Nazaret.
Pasou por Roma, Estados Unidos, Vallecas, Valencia, onde se xubiliou como profesor, e finalmente recalou en Vigo, onde puidemos aprender moito, tanto persoas moi novas como maiores, da súa sabiduría e do seu apaixoado compromiso na procura da verdade. Chegado o momento, na primavera de 2024, decidiu retirarse en La Virgen del Camino para pasar alí o que lle restase de vida.
Como comenta no vídeo que figura a continuación, o que lle queda de todas esas estancias en lugares tan diversos son as persoas, as comunidades, as irmás e irmáns que o acompañaron no camiño.
Damos grazas a Deus pola súa vida e o seu testemuño e encomendamos a José Ramón ao seu abrazo de amor.
