Preto de medio centenar de persoas xuntámonos esta mañá na Xunta por mor do ticket eléctrico, ao redor da metade eran membros da policía (nacional, autonómica e “secreta”) e gardas de seguridade. A Xunta puxo tamén a disposición das solicitantes catro funcionarias para axudaren coa tramitación ademais de tres ordenadores e un escáner. Todo eran novas a seis días de rematar o prazo.
As presentes entramos no edificio administrativo, e coa axuda do persoal da Xunta realizamos as solicitudes telematicamente, o único modo de facelas. Tantos atrancos para podermos percibir 7,5€/mes durante seis meses (10€/mes no caso de familias numerosas), uns euros que non abondan para pagar unha factura da luz que non para de medrar e menos para familias que como moito ingresen 532€ ao mes. Unha fartura, como lia unha compañeira ao rematar a entrega colectiva diante da entrada da Xunta.
Rematamos o acto esixindo:
- Gratuidade da luz para aquelas persoas con ingresos inferiores ao limiar da pobreza.
- Que a subministración eléctrica sexa recoñecida como un dereito básico para garantir unha vida digna e que, por conseguinte, estea en mans da comunidade e non privatizada en beneficio dos grandes capitais.
---
Manifesto: http://odscoia.arkipelagos.net/content/o-ticket-el%C3%A9ctrico-social-da...
Imaxes: https://www.flickr.com/photos/axluar/sets/72157649037780208